ఒక పసిబిడ్డను ఎత్తుకుని వెళ్తున్న ఒక తల్లిపై నడిరోడ్డుపై జరిగిన దారుణమైన ఘటన ఇది. హైదరాబాద్లోని మణికొండ, అల్కాపూర్ టౌన్షిప్ రోడ్ నెంబర్ 4లో మధ్యాహ్నం పూట ఈ షాకింగ్ సంఘటన చోటుచేసుకుంది. ఒక మహిళ తన చిన్నారిని ప్లే స్కూల్ నుండి తీసుకుని, ఒక చేత్తో గొడుగు పట్టుకుని నడుచుకుంటూ ఇంటికి వెళ్తోంది. సరిగ్గా అదే సమయంలో వెనుక నుండి ఒక యువకుడు ఆమెను ఫాలో అవుతూ వచ్చాడు. చుట్టుపక్కల జనాలు తిరుగుతున్నారనే భయం కూడా లేకుండా, పట్టపగలే నడిరోడ్డుపై ఆ మహిళ డ్రెస్ను వెనుక నుండి పైకి ఎత్తి అత్యంత వికృతంగా ప్రవర్తించాడు. ఆ తల్లి ఒక్కసారిగా దిగ్భ్రాంతికి గురై, వెంటనే తేరుకుని వెనక్కి తిరిగి అతడిని పట్టుకునే లోపే ఆ కామాంధుడు అక్కడి నుంచి పారిపోయాడు. ఈ మొత్తం దృశ్యాలు అక్కడ ఉన్న ఒక బిల్డింగ్ సీసీటీవీ కెమెరాలో రికార్డ్ అయ్యాయి. ఈ వీడియో సోషల్ మీడియాలో వైరల్ కావడంతో ప్రజలు, నెటిజన్లు తీవ్ర ఆగ్రహం వ్యక్తంచేశారు. పసిబిడ్డతో వెళ్లే మహిళలకు కూడా నడిరోడ్డుపై రక్షణ లేదా అంటూ వికృత చేష్టలకు ముగింపు పలకాలని డిమాండ్ చేశారు. దీనిపై నార్సింగి పోలీసులు, షీ టీమ్స్ వెంటనే రంగంలోకి దిగి, సీసీటీవీల ఆధారంగా దర్యాప్తు చేసి నిందితుడైన వడ్డె నాగరాజు అనే 26 ఏళ్ల యువకుడిని అరెస్ట్ చేశారు. అయితే ఈ సంఘటన కేవలం ఒక వ్యక్తి చేసిన వికృత చేష్ట మాత్రమే కాదు, మన సమాజంలో మహిళల భద్రత ఏ స్థాయికి పడిపోయిందో చెప్పడానికి ఒక నిదర్శనం. చదువుకుని ఎదిగి దేశాన్ని ఏలుతున్నామని సంబరపడుతున్న ఈ రోజుల్లో కూడా, కన్న బిడ్డను గుండెలకు హత్తుకుని రోడ్డు మీద ప్రశాంతంగా నడిచే స్వేచ్ఛ కూడా ఒక తల్లికి లేకపోవడం నిజంగా సిగ్గుచేటు. ప్రతిరోజూ ఇల్లు దాటి బయట అడుగుపెట్టే మహిళలు ఏదో ఒక రూపంలో ఇలాంటి అవమానాలను, వేధింపులను ఎదుర్కొంటూనే ఉన్నారు. లోపల ఎంత బాధ ఉన్నా, సమాజం తమనే తప్పు పడుతుందేమోనన్న భయంతో ఎంతోమంది మహిళలు తమకు జరుగుతున్న అన్యాయాలను గుండెల్లోనే దాచుకుని మౌనంగా ఏడుస్తున్నారు. రోడ్ల మీద తిరిగే ఇలాంటి శాడిస్టుల వల్ల, మృగాల లాంటి మనస్తత్వాల వల్ల ఆడపిల్లల ఆత్మగౌరవం నడిరోడ్డుపై బజారున పడుతోంది. చట్టాలు ఎన్ని వచ్చినా, శిక్షలు ఎంత కఠినంగా మారుతున్నా ఇలాంటి కామాంధులలో భయం రావడం లేదు. ఈ పరిస్థితి మారాలి, సమాజంలో ప్రతి ఒక్కరి ఆలోచనా విధానంలో మార్పు రావాలి. ఆడపిల్ల ఎదురైతే గౌరవించడం నేర్చుకోవాలి, ప్రతీ ఒక్కరూ తమ ఇంట్లోని మహిళలను ఎలా చూసుకుంటారో బయట ఉండే మహిళలను కూడా అలాగే గౌరవించినప్పుడే ఇలాంటి వికృత చేష్టలకు శాశ్వతంగా ముగింపు పడుతుంది.